Anche quest’anno, in occasione della Festa di Sant’Agata, riproponiamo la poesia di Geppina Macaluso che racconta in versi la vita e il sacrificio della nostra amata Patrona.

Chi festa ranni
Cchi festa ranni
Ti fannu li fedeli
Gigliu odurusu
bucciuleddu di rosa
ancora ‘n sciuri
miraculusa Patruna
’i ’sta città
ca Tua facisti
ca To’ virginità
Dinnanzi a Tia
si placa la timpesta
s’arrenni puru
u focu  ’i Mungibeddu
si ferma a terra
ca balla
e tuttu sfascia
e u cori tristi
arrèri
torna ’n festa

Facciuzza d’angilu
bedda
e di Madonna
e comu a Idda
pura
e ’mmaculata
minneddi  ’i luna
strazzari
ti facisti
ca lu Sposu Celesti
nun tradisti
A Quinzianu affamatu
ca vulìa
rusicarsi u to’ corpu
a quattru denti
sempri dicisti
No
e comu nenti
lu martiriu subisti
facennuti straziari
i carnuzzi e l’arma
cu li tinagli
e li furcuna ardenti
Oh Bamminedda
’n celu
surridenti
’Na vara
pi li strati di Catania
pi duj notti
ti porta ’m prucissioni
cu duj curduna
tirati lenti lenti
di tanta genti
ca t’adura e t’ama
tutta sfaviddanti
’i milli ciri
ornata ’i sciuri
russusangufocu
a signu di lu to’
ranni suffrìri
E u jornu dopu
di sciuri bianchi
luci
comu la to’ purizza
u to’ canduri
pari ’na zita
vistuta pi la festa
pû sposaliziu
cu l’amatu Amuri
Cittadini
Tutti
devoti tutti
a trattu a trattu
si senti
’ntra la fudda
Sommessu
rispunni un coru
Certu
Certu
Si’ a nostra Sposa
Si’ u nostru
biancu Gigliu
C’un saccu biancu
e ’n testa
’na scurzetta
ne ’sta notti di frivaru
longa e fridda
senza arriposu
’nzina a lu matinu
pi Tia si canta e prega
Piccidduzza
ranni Sant’Ajta
meravigliusa
stidda lucenti
suli risplendenti
pi tutti nuj
e pi sempri si’
a Santuzza